Wala sang lockdown sa Western Visayas — RIATF
Iloilo City — Ginklaro sang Regional Inter-Agency Task Force (RIATF) kag Regional Task Force (RTF) for the Management of Emerging Infectious Diseases nga WALA SANG LOCKDOWN sa Western Visayas.
Sa official statement nga ginpagguwa sang RIATF kag RTFCOVID-19 subong nga hapon, ginpahayag sang task forces nga wala sang deklarasyon sang lockdown sa bilog nga rehiyon.
Ginklaro man sang task forces nga ang una nga advisory nga gin-issue nila kaina sang aga ang naga-adoptar lang sang mga probisyon sang National IATF Resolution No. 104 nga napetsahan Marso 20, 2021 sa diin nasaad nga “only essential travelers from National Capital Region and its travel bubble circuit that includes Bulacan, Cavite, Laguna and Rizal area, shall be allowed to travel into and outside of Western Visayas from March 23 to April 4, 2021.”
Ang mga essential travelers amo ang mga masunod:
a. health kag emergency frontliner services personnel
b. government officials kag government frontliners personnel
c. duly-authorized humanitarian assistance actors
d. indibidwal nga nagabyahe bangud sang medical ukon humanitarian reasonse. indibidwal nga makadto sa airport bangud makadto sa iban nga pungsod
f. sin-o man nga naga-cross zones para sa trabaho ukon negosyo kag magapauli sa ila balay
g. mga Returning Overseas Filipinos kag Overseas Filipino Workers.
Gindugang sa advisory nga ang iban nga mga travelers nga INDI halin sa mga Subject Areas (NCR, Bulacan, Laguna, Cavite kag Rizal) ang ginapahanugutan nga magsulod sa Region 6, subject sa health protocols kag requirements sang mga LGUs.
Ang tanan nga flights kag biyahe sang mga barko sa rehiyon ang nagapabilin sa normal nga operasyon agud ma-cater ang mga essential travelers kag returning residents halin sa mga areas nga indi sakop sang IATF Resolution 104.
Una diri, ginkakibot ni Iloilo City Mayor Jerry Treñas ang sa pagpati niya, desisyon sang regional Inter-Agency Task Force nga “i-lockdown” ang bilog nga Region 6 nga wala sang may gintumod nga rason kag wala man sang konsultasyon sa mga local chief executives sa rehiyon.
Sa official statement nga ginpaggguwa sang alkalde, iya ginpabutyag nga, “The whole Region 6 was placed on lockdown by the Regional IATF. I do not know if any of the LCEs have been consulted about this. Another kapalpakan. I demand that the Regional IATF consult the LCEs. In behalf of Iloilo City, I am demanding an explanation from the Regional IATF.”
Sa interview sang Aksyon Radyo, ginpahayag ni Treñas nga nakibot gid siya sa amo nga tikang.
Sang Marso 21, naghatag sang statement si Mayor Jerry Treñas nga nag-request sila ni Iloilo Governor Arthur Defensor Jr sang temporaryo nga moratorium sang flights kag trips halin sa mga affected areas, apang gin-deny sang IATF ang ila request.
SIN-O ANG NAGA-CLASSIFY SANG QUARANTINE STATUS?
Base sa eksperyensiya, ang National IATF ang naga-classify sang quarantine status sang mga probinsya ukon Highly Urbanized Cities. Wala sang otoridad ang RIATF sa pagpatuman sini sa bilog nga rehiyon.
Sa subong, yara sa Modified General Community Quarantine status ang bilog nga Western Visayas.