Lalaki, pilason sang gintiro sang iya kasilingan nga pulis sa Oton; Pulis, nag-surrender man pagkatapos sang krimen
Iloilo — Pilason ang 55-anyos nga lalaki sa gintiro sang pulis nga assigned sa Arevalo Police sa Poblacion West, Oton las 6 kagab-i, Marso 24.
Ginkilala ang biktima kay Normando Estrebor sang Poblacion South samtang ginkilala ang suspect kay Police Corporal Marvin Seasol.
Sa panaysayon sang amay ni Normando nga si Ernesto Estrebor, napanghimos sang manok ang biktima sang may nagpanghaboy sang bato ila balay.
Sang ginlantaw sang biktima kun sin-o ang nagapanghaboy, nakita niya si Corporal Seasol nga may dala nga pusil kag ginpahayag gintiro siya sang lima ka beses.
Gindala sa West Visayas State University Medical Center ang biktima nga suno sa pamilya, napilasan sa likod.
Una diri, sang 2018, ginreklamo sang biktima ang suspect bangud sang ginpahayag pagpamahog sa iya kag iya pamilya.
Suno kay Estrebor, nagsugod ang masami nga pagpahog sa iya ni Corporal Seasol sang nagreklamo siya bangud sa magahod nga mini-sound sa balay sang pulis nga daw kasubong nga fiesta adlaw-adlaw sa barangay.
Kudal lang ang hulot sa balay sang pulis kag ni Estrebor. Samtang, ginkumpirmar naman ni Punong Barangay Wilmar Capaciete nga may daan nga hiligut-anun ang duha antes natabu ang insidente.
Nag-surrender sa Oton Police si Cpl. Seasol nga suspect sa pagtiro kay Normando Estrebor sang ila ginkadtuan sa balay sang iya amay sa Brgy. Buray.
Gin-turnover niya man sa mga otoridad ang iya 9mm Glock 17 nga pusil nga may 15 ka mga bala kag 5.56 M16 Elisco Rifle nga may 28 ka mga bala.
Suno kay Capt. Jayson Pancha, hepe sang Oton Police Station, wala nag-ako si Seasol nga siya ang nagtiro kay Estrebor.
Wala naman ginpa-atubang sa media si Seasol agud maghatag sang iya pahayag sa natabo. Samtang, gintinguhaan sang Aksyon Radyo nga makuhaan sang statement ang iya asawa apang nagpamalibad siya bangud wala siya sa lugar sang natabo ang insidente.
Sa pagpangusisa sang SOCO sa lugar nga natabuan sang insidente, na-recover ang apat ka mga basiyo sang bala kag duha ka mga missed fired cartridges. Nagpamalibad naman nga magpa-idalum sa paraffin test si Seasol.
