Central Philippine University, nakasugod na sang limited face-to-face class — CPU President Dr. Teodoro Robles

Iloilo City — Naka-umpisa na sang face-to-face classes ang Central Philippine University.

Ginkumpirmar ini ni CPU Pres. Dr. Teodoro Robles matapos nalakip ang unibersidad sa mga ginpahanugutan nga mag-conduct sang limited face-to-face classes.

Tunga-tunga sang Enero suno sa iya nag-umpisa ang ila second semester.Mga 4th year students sang College of Medicine pa lang ang may schedule para sa limited face-to-face classes suno kay Dr. Robles pero gin-athag niya nga wala sang klase nga himuon sa unibersidad bangud lunsay mga hospital duty ang ila himuon.

Nagabulos-bulos suno sa iya sa Iloilo St. Paul’s Hospital kag Iloilo Mission Hospital kun diin sila naga-duty ang ginabanta sa 80 ka mga 4th year College of Medicine students.

Gin-athag man ni Dr. Robles nga wala ginapilit ang estudyante. Regular sila nga ipaidalum sa COVID-19 testing kag indi pag i-expose sa mga COVID-19 patients.

Samtang ginpahayag man ni Dr. Robles nga wala pa sila naka-desisyon kun ano ang himuon sa mga mga 1st year tubtob 3rd year students sa pagpahanugot sang limited face-to-face classes.