2 patay sa aksidente sa Janiuay
By: Aine Grace Bravo | March 29, 2021
JANIUAY, Iloilo – Dead-on-arrival ang driver sang motorsiklo kag ang back rider sang isa man ka motorsiklo sang nagbunggu-anay sa Barangay Jibolo, Janiuay kahapon sang hapon, Marso 28.
Ginkilala ang driver sang isa ka motorsiklo nga napatay kay John Marino, 33-anyos nga may pilas sa ulo. Gindala naman sa ospital ang iya asawa nga si Analyn Marino, 32-anyos nga may fractured sa wala nga tiil.
Samtang, pilason ang driver sang isa pa ka motorsiklo nga si Mark Joseph Ajeno, 20-anyos nga na-fracture ang wala nga tiil. Dead-on-arrival naman ang iya amay nga ginkilala kay Josepino Ajeno, 50-anyos nga may pilas sa ulo.
Suno kay PSMS Eddie Roncal sang Janiuay Police Station, naglusot sa ginasundan niya nga motorsiklo si Mark Joseph Ajeno rason nga nabunggu-an ang nasugata nga motorsiklo nga ginamaneho ni Marino.
Natumba naman ang motorsiklo nga nagasunod sa mag-amay bangud nalapakan ang nagtabog nga helmet. Wala nasamaran ang driver sang motorsiklo nga si Janil Estiva. – via Angel Mae Ciudad/Francisco “Kikik” Enar