Pulis nga gintudlo nga nagtiro sa iya kasilingan sa Oton, gin-relieve sa Arevalo Police Station
By: Aine Grace Bravo | March 29, 2021
ILOILO CITY – Ginsaylo sa Personnel Holding and Accounting Unit sang Iloilo City Police Office si PSSg Marvin Seasol, ang pulis nga gintudlo nagtiro sa iya kasilingan sa Poblacion West, Oton sang Marso 24, 2021.
Kasunod ini sang pag-relieve sa iya sa Arevalo Police Station sang Marso 25, suno kay PCPT Chen Tañagras, hepe sang Arevalo Police Station.
Marso 26 sang gin-file ang kaso nga frustrated murder batok kay Seasol pero nagpiyansa siya sang P120,000.
Antes nangin suspek sa pagtiro si Seasol sa iya kasilingan nga si Normando Estrebor, nagapangatubang na siya sang tatlo ka kaso sang pagpangastigo nga gin-file sa National Police Commission, suno kay Napolcom 6 Director Atty. Joseph Celis.
Ginrekomendar sang Napolcom 6, suno kay Celis, ang pag-dismiss kay Seasol apang wala pa sang desisyon halin sa Napolcom en banc. –via Angel Mae Ciudad