Pwersa sa NPA sa Visayas, nagluya na suno sa Army

By: Aine Grace Bravo/Khenjo Terco | March 30, 2021

ILOILO CITY – Nagluya na ang pwersa sang New People’s Army sa ila area of operation sa Visayas.

Pahayag ini ni Major Cenon Pancito III, spokesperson sang 3rd Infantry Division sang Philippine Army, kadungan sang pagdumdom sang ika-52 nga anibersaryo sang NPA kahapon, Marso 29.

Dapat kuntani suno kay Pancito, naghimo na sang pag-atake ang mga rebelde batok sa pwersa sang gobyerno kag sa mga government installations may kaangtanan sa ila anibersaryo.

Nakabentaha ang gobyerno sa subong nga sitwasyon, suno kay Pancito, kag isa sa iya mga gin-ehemplo ang plano sang mga rebelde nga NPA nga magpang-atake sa Guihulngan City, Negros Oriental sang Marso 23 apang naunahan sila sang mga suldado.

Napatay man kahapon ang duha ka miembro sang NPA sang na-engkwentro ang PNP Special Action Force sa Santa Catalina, Negros Oriental.

Mangin mabinantayon gihapon ang militar bangud indi mapaktan kun san-o maga-atake ang mga rebelde nga NPA batok sa gobyerno, suno kay Pancito. – via Aljohn Torreta