6 governors, 22 mayors sa Western Visayas, ginlakip sang DOH sa Priority Group A1.5 sang COVID-19 vaccination
By: Aine Grace Bravo | April 9, 2021
ILOILO CITY – Nalakip ang anum ka gobernador kag 22 ka mayors sa Region 6 sa Priority Group A1.5 sang COVID-19 vaccination sa bug-os nga pungsod.
Base ini sa Advisory No. 26 nga ginpagguwa sang National COVID-19 Vaccination Operations Center sang Abril 5, 2021.
Sa Advisory nga pirmado ni DOH Undersecretary Dr. Myrna Cabotaje, nahisugtan sa 108th Meeting sang Inter-Agency Task Force for the Management of Emerging Infectious Diseases nga pwede makapabakuna sang COVID-19 vaccine ang mga governors kag mayors sang mga critical kag high risk nga mga probinsya, syudad kag municipalities sa pungsod.
403 tanan ka local chief executives ang ginlakip sa Priority Group A1.5 –57 ka gobernador, 25 ka mayors sang highly urbanized/independent component cities kag 321 ka mayors sang component cities/municipalities.
Ginkumpirmar ni Dr. Mary Jane Juanico, Head sang DOH 6 Infectious Disease Cluster Unit, nga nalakip sa Priority Group A1.5 sa Western Visayas ang mga masunod:
*Governors sang Capiz, Aklan, Iloilo, Negros Occidental, Antique kag Guimaras;
*Bacolod City Mayor Evelio Leonardia;
*Mayors sang Jamindan kag Cuartero sa Capiz;
*Mayors sang Malay kag Nabas sa Aklan;
*Mayors sang Bingawan, Guimbal, Sta. Barbara, Leon, Batad kag Calinog sa Iloilo;
*Mayors sang Binalbagan, Sipalay, Bago, Cadiz, Talisay, Murcia sa Negros Occidental;
*Mayors sang Sibalom, San Remegio, Anini-y kag San Jose sa Antique; kag
*Mayor sang Sibunag sa Guimaras.
Nabutang sa Advisory nga ang mga LCEs nga naga-edad 59-anyos panubo ang bakunahan sang Sinovac vaccine; ang mga LCEs nga 60-anyos pasaka ang bakunahan sang AstraZeneca vaccine, kun available pa; kag ang mga LCEs nga may co-morbidities ang bakunahan sang Sinovac vaccine. –via DOH