Balor P14.4M nga 13 ka Mitsubishi Strada, indi exclusive para sa mga konsehal — GSO
ILOILO CITY — 13 ka mga salakyan ang ginbakal sang Iloilo City Government para sa mga konsehal. Sa data P1, 110, 000 ang balor sang kada pick up nga 4×2 Mitsubishi Strada.
Nagabalor P14.4-Million ang 13 tanan ka mga salakyan. Gin-bid sang Enero ang mga salakyan kag nagdaug nga bidder ang Avescor nga nahamtang sa MH Del Pilar. Gin-issue ang Notice to Proceed sang Marso 29.
Suno kay General Services Office head Joren Sartorio, indi exclusive ang mga salakyan sa mga konsehal bangud pwede mabawi sa ila kun may departamento nga mas nagakinahanglan.
Ang mga salakyan sang syudad sa subong, suno kay Sartorio ang lunsay reconditioned multicabs. Ginpahayag ni Sartorio nga wala pa na-isyuhan sang Property Acknowledgment Receipt ang mga konsehal. — via Jeremae Ventar