Pamilya ni Lory Mae Baylon, madangop sa NBI para sa pag-autopsy sa bangkay; CIDG, pangayuan man sang bulig para sa imbestigasyon sa natabo
ILOILO CITY (UPDATE) — Madangop sa National Bureau of Investigation (NBI) ang pamilya ni Lory Mae Baylon, ang iloy nga gin-alegar sang iya pamilya nga ginpulihan kastigo sang mag-asawa nga retired police kag maestra sa Boulevard, Molo.
Suno kay Dorry Walawat, luyag nila nga ang NBI ang ma-autopsy sa bangkay sang iya hinablos.
Nagpangayo man sila sang bulig sa Criminal Investigation and Detection Group (CIDG) nga imbestigaran ang natabo. “Mangayo kami [sang] bulig sa NBI. Bwas (April 10), plano namon nga makadto sa NBI. Nangayo naman kami [sang] bulig sa CIDG kag pasalamat gid kami nga handa sila magbulig sa amon.”
Tubtob subong, wala pa nadala sa ila balay ang bangkay ni Baylon bangud ginahulat pa nga matapos ang autopsy.
Nagpahibalo naman ang pamilya sa Molo police nga luyag nila nga NBI ang ma-conduct sang autopsy. Na-istorya naman ni Walawat kag nagkasugot na sila sang bana sang iya hinablos sa bag-o nila nga lihok.
Una nga gin-alegar sang pamilya ni Baylon nga ginpulihan kastigo nanday retired police Joseph Agana kag asawa niya nga maestra nga si Chona sang Marso 24.
Pagkagab-i sini, gindala sa ospital si Baylon bangud sa paglain sang iya pamatyag. Marso 29, ginbalik sa ospital si Baylon kag nagbata sang Marso 30.
Abril 2 sang napatay ang lapsag kag Abril 3 naman napatay si Baylon. Ginpanginwala sang mag-asawa nga Agana ang akusasyon batok sa ila. –via Firingline
