Mag-iloy, patay sa sunog sa Leganes

By: Aine Grace Bravo | April 16, 2021

LEGANES, Iloilo –Patay ang mag-iloy sa sunog sa San Vicente Village, Barangay Poblacion, Leganes kaina sang kaagahon, Abril 16.

Nasapwan na sa ground floor ang sunog nga lawas nanday Anna Vivien Ganon, 48-anyos, kag Anthony Kim, 21-anyos.

Suno kay SFO4 Le Sampiano sang BFP Leganes, wala pa ma-establisar kun paano nagsugod ang sunog.

Ginpahayag ni Sampiano nga narumpag ang second floor nga human sa kahoy.

Posible suno kay Sampiano nga na-suffocate ang mag-iloy kag nalipong rason nga wala na nakagguwa sa balay.

Tinguhaan ni Sampiano nga mapamangkot si Andrew Ken, 15-anyos, nga isa pa ka bata ni Vivien matapos nga nakaluwas sang naglumpat halin sa second floor. Gindala sa ospital si Andrew.

Magluwas sa balay ni Vivien, nasunog man ang ila nga ancestral house kag ang salakyan sang pamilya.

Si Vivien kag ang iya duha ka bata lang ang naga-istar sa balay bangud nagatrabaho sa luwas sang pungsod ang iya bana. – via Dave Bucayan/Francisco “Kikik” Enar