Bangkay sang 30-anyos nga lalaki, nasapwan nga naga-utaw utaw sa sapa sa Jibao-an, Pavia

PAVIA, Iloilo – Patay na sang nasapwan nga naga-utaw-utaw sa sapa ang lalaki sa Barangay Jibao-an, Pavia, mga las-5 sang hapon, Abril 20.

Ginkilala sang iya pamilya ang lalaki kay Faustino Florida, 30, residente sang nasambit nga lugar. Sa inisyal nga imbestigasyon ni Police Senior Master Sergeant Janjan Serra sang Pavia Police Station, nahulog sa improvised taytay sang sapa si Florida.

Ginabanta nga nagadalom sang tres (3) metros ang tubig sa sapa. May gasgas sa agtang ang lalaki. Sa pagpangusisa ni Serra, naka-inom ang lalaki kahapon antes wala na nakita.

Nagapati naman ang pamilya nga wala sang foul play sa kamatayon ni Florida pero ginhatagan sila sang Pavia police sang request kun ipa-autopsy nila ang bangkay agud mahibaluan gid ang kamatayon.

Nakuha na ang bangkay sa sapa. –via Firingline with reports of Aksyon Angel Mae Ciudad, Jorge Cabrera