Mag-asawa, patay sang nagbungguanay ang SUV vs truck sa Pototan

By: Aine Grace Bravo | April 20, 2021

POTOTAN, Iloilo – Patay ang mag-asawa nga sakay sa SUV sang nagbunggu-anay sila sang truck sa Barangay Amamaros, Pototan kahapon sang hapon, Abril 19.

Wasak ang atubang nga parte sang SUV kag naipit ang driver kag upod sini nga yara sa front seat.

Pila pa ka minutos ang nagligad antes nakuha sanday Emil Pagtolon-an kag asawa niya nga si Merren nga residente sang Bagacay, Passi City.

Gindala pa sa ospital ang mag-asawa pero pareho nga gindeklarar nga dead-on-arrival.

Arestado naman ang driver sang truck nga si Regent Albacete, 20, sang Mandurriao, Iloilo City.

Sa imbestigasyon ni Police Staff Sergeant Raffy Gonzales sang Pototan Police Station halin sa Iloilo City kag papuli sa Passi City ang direksyon sang SUV samtang halin sa Pototan pa-Iloilo City naman ang direksyon sang truck.

Ginsaysay ni Albacete nga gin-agaw sang SUV ang iya lane matapos nga nag-overtake sa ginasundan nga wing van. Suno sa iya, ginwarik niya ang manibela agud makalikaw pero nagbunggu-anay gid sila sang SUV.

Pero suno naman kay alyas Annie nga residente sang lugar, wala siya sang nakita nga salakyan nga ginasundan ang SUV. Nakibot na lang sila sang nakabati sang lagbong. Ginpahayag naman ni alyas Nonoy nga madasig ang dalagan sang truck.

Padayon pa nga gina-imbestigaran sang Pototan police kun ano gid ang natabo. –via Angel Mae Ciudad, Dave Bucayan, Francisco “Kikik” Enar