“Indi ina luxury kundi necessity” –BM Domingo Oso sa plano sang Provincial Government nga baklan sang salakyan ang mga board members

ILOILO (April 27, 2021) – Tuman ka kinahanglan sang mga board members sa probinsya sang Iloilo ang salakyan sa ila paglibot sa ila mga constituents.

Suno ini kay 4th District Board Member Domingo Oso sa plano sang Provincial Government nga magbakal sang salakyan para sa mga board members.

Suno kay Oso, indi makabig nga luxury ang salakyan para sa ila kundi necessity.

Natabuan lang suno sa iya nga nagapangatubang sang COVID-19 pandemic ang probinsya.  

Paathag ni Oso, tiempo pa ni former Governor Arthur Defensor ang amo nga plano kag sang nagpangalagad si Governor Arthur Defensor Jr, naghingyo ang mga board members nga baklan sila sang salakyan.

Ginpahayag ni Oso nga bisan halin sa lain-lain nga distrito ang mga board members, 42 ka mga banwa kag isa ka component city ang ila ginalibot kag gina-ulikdan.

Mabudlay suno sa iya para sa isa ka board member nga wala sang mobility kag nahangpan man ni Governor Defensor ang ila nga trabaho.

2019 sang gin-aprubahan sang Sangguniang Panlalawigan ang pondo para sa pagbakal sang salakyan, apang may failure of bidding gani wala nadayon tubtob nga naabtan sang COVID-19 pandemic, dugang ni Oso. – via BBB