Municipal Administrator sang Pilar, Capiz, nakabaton sang pamahog antes siya ginpatay — Pulis

CAPIZ – Nakabaton sang pamahog si Pilar Municipal Administrator John Heredia antes siya ginpatay sang riding-in-tandem kahapon, Mayo 2 sa Lawaan, Roxas, City. Gin-ako ini sang iya asawa nga si Atty. Cresilda kay Lt. Col. Ricardo Jumuad Jr., hepe sang Roxas City Police Station.

Duha ka mga anggulo ang ginasundan sang kapulisan sa pagpatay kay Heredia. Una suno kay Jumuad ang kahilabtanan sa trabaho kag ikaduha ang pagsuporta niya sa National Task Force to End Local Communist Armed Conflict (NTF-ELCAC).

Ginpahayag ni Jumuad nga nagpa-blotter ang mag-asawa nga Heredia sa Pilar Police Station sang Enere 21, 2021 nga nagapasalig nga magasuporta sila sa mga programa sang gobyerno kag indi sila kabahin sang cause-oriented group.

Nabudlayan ang Roxas City Police sa identity sang mga suspetsado nga nagtiro kay Heredia bangud may tabon ang ila nga guya sang hood sang jacket base sa na-capture sang CCTV camera.

Si Heredia ang nangin chairman sadto sang National Union of Journalists of the Philippines Capiz Chapter kag nangin isa sa mga NUJP national board of directors. — via PM Reports