1 patay, 1 na-ospital matapos nakuryente sa Ajuy

AJUY, ILOILO – Patay ang driver sang traktora sang nakuryente samtang naga-arado sa talamnan sa Brgy. Pili, Ajuy las-6 kahapon sang aga, Mayo 30.

Ginkilala ang napatay kay Jerry Dela Cruz, 52 anyos sang Brgy. Mangorocoro, Ajuy. Ginhingagaw pa dala sa ospital si Dela Cruz apang gindeklarar nga dead-on-arrival.

Ginabulong naman sa ospital ang upod ni Dela Cruz nga si Leonilo Ballener, 60 anyos sang Brgy. Pili, Ajuy.

Suno kay PLT Danilo Noca, hepe sang Ajuy Police Station, nasangit ang atop sang traktora nga ginamaneho ni Dela Cruz sa nagawayway nga kable sang kuryente rason nga iya ginkuha. Wala siya nakahibalo nga may open wire kabangdanan nga nakuryente kag nahulog siya sa traktora.

Nagdali-dali naman palapit sa iya si Ballener agud nga magbulig apang bangud may tubig ang talaman, pati siya ang nakuryente man. Nakakamang si Ballener palayo kag nakapangayo sang bulig.

Ginapanag-iyahan ni Edsil Guijarno ang nagawayway nga kuryente nga naga-angut halin sa iya nga balay pakadto sa poste.

Gina-imbestigaran pa sang Ajuy police kun may salabton si Guijarno sa natabo. –via Francisco “Kikik” Enar