Masobra 5,000 indibidwal nga indi kabahin sang A1, A2 kag A3 priority groups sa Western Visayas, nabakunahan na sang COVID-19 vaccine base sa initial nga impormasyon sang DOH 6
Iloilo City – Lampas 5,000 ka mga indibidwal nga indi kabahin sang A1 (medical frontliners), A2 (senior citizens), kag A3 (may comorbidities) Priority Groups ang nabakunahan na sa Western Visayas base sa inisyal nga impormasyon sang Department of Health 6.
Sa Priority Groups A1,A2, kag A3 pa lang mahimo makabakuna batuk sa COVID-19 suno sa Inter Agency Task Force magluwas sa NCR plus 8 nga mahimo na makasugod sa pagbakuna sa A4 (workers sa economic sector kag iban pa).
Suno kay Dr. Bea Camille Fillaro-Natalaray, spokesperson sang DOH6, base sa ila data, may 5,819 ka mga indibidwal nga kabahin sang A4 kag A5 nga nabakunahan na sang first dose sa rehiyon.
Dugang diri, may 384 pa gid ka mga indibidwal sa A4 kag A5 nga nabakunahan na sang second dose.
Gina-validate sang DOH6 kun nabakunahan gid man ang mga indi kabahin sang Priority Groups A1,A2, kag A3.
Importante ang pagsunod sa prioritization sa pagbakuna agud mapanubo ang numero sang mga mahimo magmasakit kag mapatay, kag indi man ma-overwhelm ang health care system.
‘INDI LANG SA ILOILO CITY’
Sa inisyal nga impormasyon sang DOH6, indi lang sa Iloilo City na-monitor ang reportedly pagbakuna na sa mga indi kabahin sang A1,A2, kag A3 Priority Groups.
Sa pagpanalawsaw sang Aksyon Radyo Iloilo, may mga indibidwal nga indi kabahin sang A1,A2, kag A3 apang nabakunahan na sa syudad.
Suno sa pila ka mga nainterview sang Aksyon Radyo Iloilo, may himata ang natungdan nga naga-obra sa City Health Office rason nabakunahan siya bisan indi kabahin sang nasambit nga mga priority groups.
Ginkumpirmar man ni DILG City Director Oscar Lim Jr ang pagpalusot sang pagbakuna sa syudad.
Suno kay Director Lim, may tubtob 20 ka mga construction workers nga may vaccination ticket halin sa barangay para magpabakuna apang wala nadayon bangud indi kabahin sang priority groups.
Nakalab-ot na sa DOH Central Office ang amo nga concern. — with reports from Aksyon Aljohn Torreta