Biyahe sang mga fastcraft kag RoRo vessels pa-Bacolod, Cebu, Manila, Palawan kag Mindanao, suspendido subong nga adlaw, Hunyo 2; Biyahe sang mga sakayan pa-Guimaras, kanselado man bangud sang Bagyo DantePH
Suspendido ang biyahe sang mga RoRo, Fast craft, kag mga sakayan pangdagat sa Iloilo subong nga adlaw bangud sang bagyo Dante.
Suno kay Commander Edison Diaz, station commander sang Philippine Coastguard – Iloilo wala anay sang biyahe ang mga RoRo kag Fast Craft padulong sa Bacolod, Cebu, Palawan, Manila, kag Mindanao.
Wala man sang biyahe ang mga modernized boats halin Iloilo pa-Guimaras kag vice versa bangud napaidalum sa storm signal number 1 ang Iloilo City kag Guimaras.
Ginakabig nga special area of concern ang dagat sa tunga sang Iloilo kag Guimaras bangud may mga tiun nga indi kitaon ang isla kun mabaskog ang hangin kag dalagko ang mga balod.
Pasugtan naman nga makabalik sa pagbiyahe ang mga sakayan kun magkanay na ang sitwasyon.