Pag-access sa Jordan Food Terminal kag Buenavista Commercial Complex, mangin limitado sa pagpatuman sang EO No. 24 ni Guimaras Gov. Samuel Gumarin
Guimaras — Mangin limitado ang pag-access sang mga taga-Guimaras sa Jordan Food terminal nga nahamtang sa Brgy. San Miguel kag sa Buenavista Commercial Complex and Public Utility Market nga yara naman sa Brgy. Mclain.
Kasunod ini sang pagguwa sang Executive Order number 24 ni Guimaras Gov. Samuel Gumarin nga nagaplastar sang pila ka mga restrictions sa hulag sang mga Guimarason agud mapunggan ang paglapta sang COVID-19 nga maga-epekto las 12:01 sa Lunes sang kaagahon, Hunyo 7.
Pwede lang nga makakadto sa Jordan Food Terminal ang mga taga-Sibunag kun Miyerkules kag Sabado; Martes kag Biernes naman para sa mga taga-Nueva Valencia; Lunes kag Huwebes sa mga taga-San Lorenzo; kag Adlaw-adlaw naman para sa mga taga-Jordan.
Samtang ang Buenavista Commercial Complex naman, pwede lang nga makadtuan sang mga taga-San Lorenzo kun Lunes kag Huwebes kag adlaw-adlaw naman para sa mga taga-Buenavista.
OPERATING HOURS
Ginpalip-utan ang business hours sang mga establisemento.
Nabutang sa EO, nga halin las-6 sa aga tubtob la-1 sa hapon lang pwede nga magbukas ang mga business establishments magluwas sa mga botika nga ginpahanugutan tubtob las-3 sa hapon.
Pati ang oras sa pagbiyahe sang mga sea vessels ang ginpalip-utan man halin las-6 sa aga tubtob las 3 sa hapon.
Samtang ang mga public utility vehicle naman ang pwede makabiyahe halin las-5 sa aga tubtob las-4 sa hapon. — via Firing Line
