Travel pass sa San Rafael, Iloilo, alkalde lang ang naga-issue; Sistema, balik-awot suno sa residente

Iloilo – Ginreklamo sang concerned citizen sa San Rafael, Iloilo ang ginpahayag balik-awot nga sistema sa ila banwa bangud ang mayor lang ang naga-issue sang travel pass.

Suno sa concerned citizen nga si alyas Russel, indi magnubo sa 200 ang nagkadto sa munisipyo sang Hunyo 4 para magkuha sang travel pass.

9:00 AM sang nagkadto sa munisipyo si Russel apang ginpahayag 2:00 P.M. na sang na-issuehan siya sang travel pass.Dugang diri, ginpahayag indi man istrikto nga ma-observe ang physical distancing nga lakip sa minimum public health standards.

Base sa Executive Order Number 175 ni Governor Arthur Defensor Jr., ang mayor ang maga-issue sang travel pass sa mga Authorized Persons Outside of Residence nga naga-trabaho ukon naganegosyo sa livelihood sectors.

Kinahanglan man ang travel pass kun magbakal sang basic necessities sa iban nga banwa.Mahimo matugyan sa mga punong barangay ang pag-issue sang travel pass.

Sa impormasyon sang Aksyon Radyo Iloilo, amo man ang sistema sa banwa sang San Rafael sang nagligad nga tuig sa pagpatuman sang Enhanced Community Quarantine.Makapila ka beses nga gintawagan kag ginpadal-an sang text message sang Aksyon Radyo Iloilo si San Rafael Mayor Roberto Belleza apang wala siya nakasabat. — with reports from Aksyon Aljohn Torreta