Barangay kagawad na ginatudlo supplier sang illegal drugs sa siyudad kag probinsya sang Iloilo kag kaiping nga mga probinsya, dakup sa drug buy bust operation sa Oton

ILOILO – Dakup sa drug buy bust operation ang barangay kagawad nga ginatudlo sang Philippine Drug Enforcement Agency 6 nga supplier sang illegal drugs sa syudad kag probinsya sang Iloilo kag sa kaiping nga mga probinsya.

Ginkilala ang subject kay incumbent Talaba, Badiangan Barangay Kagawad Jade Catedral, 35-anyos, nga nadakpan sa Orchard B, Abilay Norte, Oton.

Na-recover sa subject ang 15 tanan ka sachets sang suspected drugs nga ginabanta nagabug-at sang 15 grams, duha ka cellphones, duha ka pusil, IDs, P5,000 buy bust money kag P7,980 nga proceeds.

Suno kay Provincial Officer Jeanette Reyes sang PDEA6, si Catedral ang ginatudlo sang mga nagkaladakpan sa buy bust operations nga supplier sang illegal drugs sa probinsya kag syudad sang Iloilo.

Ginakabig man siya nga high value target individual, suno kay Reyes. Involved sadto sa robbery incident ang subject kag gina-validate pa kun matuod nga gun-for-hire siya.

Gina-verify pa sang PDEA 6 kun matuod nga confidential agent siya sang 3rd Military Intelligence Battalion bangud may na-recover sa iya nga ID nga nag-expire sang 2019.

Ginpahayag naman ni IPPO Director Police Colonel Gilbert Gorero nga kilala nga elected official sa Badiangan ang subject pero wala na-monitor ang iya involvement sa illegal activities.

Sang ginhimo ang operasyon, suno kay Reyes, tuyo pa kuntani nga magbato ang subject.

Ginpanginwala sang subject nga iya ang mga na-recover nga suspected illegal drugs, pero gin-ako niya nga iya ang duha ka pusil nga na-recover. — via Aksyon Farrah Mae Morano