Iloilo City COVID-19 team, target nga mapanubo ang kaso sang COVID-19 sa siyudad sa katapusan sang Hunyo
ILOILO CITY – “Kun makita ninyo ang cases [sang COVID-19] naton mataas gid. Wala naganubo gihapon sa 100. So kinahanglan anay nga makita naton, nga ang aton nga mga measures kag mga interventions nga gin-ubra naton nga maga-epekto na kag mapa-ariya naton ang numero sang daily cases sa siyudad [sang Iloilo].”
Ini ang ginpahayag ni Iloilo City COVID-19 team Spokesperson Jeck Conlu kasunod nga gin-rekomendar nila kay Mayor Jerry Treñas ang pag-extend sang modified enhanced community quarantine (MECQ) tubtob sa Hunyo 30. Matakop sa Hunyo 15 ang MECQ status sang siyudad gani ma-request ang Iloilo City government sa National Inter-Agency Task Force sang extension tubtob sa katapusan sang bulan.
Suno kay Conlu, “Ginatan-aw sang aton COVID-19 team nga kinahanglan gid nga i-extend naton ini para nga makahimo pa kita sang iban nga measures under MECQ nga status sang siyudad. Ini’ng bulan sang June ang target gid nga mapa-ariya gid naton ang [COVID-19] cases sa siyudad.” “Nagapabor siya,” ini ang reaksyon suno sa iya ni Mayor Treñas sa rekomendasyon sang COVID-19 team.
Masobra isa ka semana pa lang suno sa iya gin-implementar ang mga strikto nga measures pareho sang border control, surgical lockdowns kag iban pa gani indi pa makita ang resulta.
Gindugang pa ni Conlu, “Sa bilog nga region [6] kita [sa Iloilo City] ang may pinakamataas nga rate sang swab test kay ang gina-ubra naton…aside sa contact tracing, naga-test kita sang mga posible nga ginadudahan naton nga mga area nga may COVID dira. And aside dira may ara man kita nga gina-test nga mga ILI—buot silingon ini’ng mga may symptoms…may mga flu-like symptoms. Ginapangita na sang aton mga district doctor kag gina-endorse for swabbing. So ginapangita gid naton si COVID-19 para once mabal-an naton..ma-isolate naton ini’ng COVID-19, eventually ma-amat-amat man ini panaug.”
Masangkaron nga contact tracing kag testing ang ginahimo sang siyudad rason nga nagadamo ang kaso.
Ginalauman nila nga antes matapos ang Hunyo makita na ang resulta sang mga interventions kag mapanubo ang kaso.
“Everytime may discussion, ara gid na permi gina-discuss gid na ang epekto sang every decision nga ubrahon naton. Sa subong ang sitwasyon gid naton –ang hospital naton puno, damo ang waiting bisan regular patient ikaw mabudlayan ikaw makapa-ospital. For the meantime ang gina-proteksyunan sang COVID-19 team ang aton nga healthcare system,” dugang ni Conlu.
Ginpahayag ni Conlu nga short-term decision lang ini kag indi magdugay bangud makita man gilayon ang epekto.
Lakip man sa gina-protesksyunan nga indi ma-overwhelm ang mga medical frontliners kag mga ospital bangud kun magsarurot ini, posible nga apektado gihapon ang ekonomiya sang siyudad.
Ginatun-an man suno sa iya sang COVID-19 team nga maamat-amat batak ang ekonomiya sang siyudad samtang napaidalom sa MECQ. –via Firingline
