BFP 6, ginhatagan sang lima ka adlaw agud sabton ang show cause order sang Iloilo City Gov’t may kaangtanan sa natabo nga mass gathering sa Jaro

ILOILO CITY – Ginhatagan sang lima ka adlaw si Bureau of Fire Protection (BFP) 6 Director Jerry Candido agud sabton ang show cause order nga ginpadala sang Iloilo City government.

Ini may kaangtanan sa ginhiwat nga mass gathering event nga may pa-catering pa sang Hunyo 10, sa Jaro bisan napaidalum ang siyudad sa modified enhanced community quarantine (MECQ).

Sa pagkahibalo ni Iloilo City COVID-19 team Spokesperson Jeck Conlu nga naserbe na sang taga-City Legal Office ang show cause order kaina, Hunyo 14, kag napadal-an naman ang BFP 6 sang kopya sini sa ila e-mail address.

“Sa pagkabalo ko, daw ginhatagan sila five days para sabton ang ato’ng show cause order,” suno kay Conlu.

Masugod suno sa iya ang lima ka adlaw sa tiun nga nabaton nila kopya sang show cause order.

Una na ginpahayag ni Mayor Jerry Treñas nga tan-awon niya kun may sanctions nga ihatag sa BFP 6 sa pag-conduct sang mass gathering event.

Ang paghatag sang sanctions ang nagadepende sa sabat ni Director Candido, dugang sang alkalde. –via PM Reports