Mga residente sa Igmasandig, Valderrama, Antique, indi na pagpasugtan nga makabalik sa ila balay kasunod sang pag-usmod, paglitik sang duta — Mayor Roquero
VALDERRAMA, Antique — Indi na pwede ma-istaran ang mga balay nga apektado sang nag-usmod kag paglitik sang duta sa Brgy. Igmasandig, Valderrama, Antique.
Ini suno kay Valderrama, Mayor Mary Joyce Roquero, bangud gin-rekomendar sang Mines and Geosciences Bureau 6 nga “No Build Zone” na ang amo nga lugar.
Ginpabutyag man niya nga delikado na nga istaran ang lugar bangud sa subong partially damage pa lang ang mga balay kag posible nga marumpag kun magpadayon ang pag-usmod sang duta.
85 ka pamilya ang gin-evacuate, suno kay Mayor Roquero. 17 ang nagatinir sa sentro sang banwa; 19 sa Valderrama Central Elementary School samtang nagatiner sa ila himata ang iban pa nga pamilya.
Ginapangitaan naman sang LGU ang mga evacuees sang mahimo nila nga sayluhan nga safe.
Ginpabutyag ni Mayor Roquero nga may gina-negosyar na siya nga tag-iya sang duta kun ibaligya niya ang property agud mapangitaan sang LGU sang pondo.
Ginalantaw naman ang posibilidad nga sayluhon ang mga residente sa gina-obra nga housing project sang National Housing Authority nga malapit sa ila barangay kun luyag sang mga apektado nga residente.
Suno pa sa iya, “Ang priority ko gid nga mangita sang duta within mismo sa barangay para at least indi sila madula sa mapa.”Sa subong, ginalantaw pa sang LGU ang pwede nila mabulig sa palangabuhian sang mga residente nga gin-evacuate.
Temporaryo nga naga-provide ang LGU sang pagkaon kag may yara man sang pila ka mga indibidwal nga nagahatag sang bulig.
Nagpanugyan ni Mayor Roquero sa tanan nga mga pumuluyo nga gilayon mag-evacuate kun may advisory halin sa banwa kasubong sang pagbaha.Nagapanawagan man siya sa mga luyag magpalab-ut sang bulig sa mga pamilya nga gin-evacuate. Suno sa iya, pagkaon ang kinahanglan sang mga evacuees. |via Firingline