Kargador nga nagpositibo sa COVID-19 nga nalagyo kag wala nag-upod pakadto sa quarantine facility, nakit-an nga hubog sa City Proper
Iloilo City – Nakit-an nga hubog sa Fuentes St., City Proper pasado las-10 kagab-i, Hunyo 14 ang kargador nga nagpositibo sa COVID-19 sang nalagyo kag wala nag-upod pakadto sa quarantine facility.
Suno kay Police Captain Shella Mae Sangrines, hepe sang City Proper Police Station, nangayo sang police assistance si PSTMO Head Mr. Jeck Conlu sa ila istasyon bangud indi magpa-subject sa quarantine ang natungdan.
Dugang pa ni Sangrines, ginkabalak-an sang mga taga-PSTMO nga basi makapanglaton ang kargador sang balatian kag may iban pa nga ginkadtuan amo nga gilayon nila gin-report.
Una nga nagresponde ang tanod sa lugar apang wala siya nakapalapit sa hubog nga kargador bangud nagapangaman batok sa COVID-19.
Nagpangayo sang bulig ang mga nagresponde nga pulis sa City Disaster and Risk Reduction and Management Office (CDRRMO) agud makagamit sang personal protective equipment (PPE) bilang proteksyon sa balatian.
Gilayon man nga gindala sa quarantine facility ang nagpositibo nga kargador matapos nga natulugan sa sulod sang truck.
Wala naman nakapangusisa ang City Proper police kun ano ang rason kun ngaa nalagyo kag nagpahubog ang lalaki.
Nagpanawagan naman si Capt. Sangrines sa publiko nga mag-coordinate sa kapulisan kag sa mga otoridad pananglitan nga magpositibo sa COVID-19 kag magsunod sa mga protocols agud malikawan nga maglapta ang balatian. — via Aksyon El John Mejia