Kapulisan sa probinsya sang Iloilo, tutukan ang pagpatuman sang surgical lockdown kasunod snag pagdula sang Municipal Border Control Points — IPPO
Tutukan sang kapulisan sa probinsya sang Iloilo ang pagpatuman sang mga surgical lockdowns sa mga kabarangayan nga may magpositibo sa COVID-19.
Ini ang ginpabutyag ni Iloilo Police Provincial Office Director Col. Gilbert Gorero kasunod sang pagdula sang mga municipal border control points umpisa sa Hulyo 1.
Suno kay Col. Gorero, maga-pull out na ang mga pulis nga na-assign sa mga municipal borders. Nagasunod lang sila nga mga kapulisan suno sa iya sa mandu ni Gov. Arthur Defensor Jr., kag sa kun ano ang nabutang sa executive order sang gobernador.
Pero ginpahayag ni Gorero nga mahimo naman nga magpabilin ang iban nga kapulisan kun luyag sang pila ka mga LGUs nga ipabilin man ang border control points sa ila mga banwa.
‘LIQUOR BAN’
Gin-athag naman ni Col. Gorero nga bisan ginapasugtan na ang pagbaligya kag pagbakal sang makahulubog nga ilimnon sa probinsya, dumilian gihapon ang pagkonsumo sini sa mga pampubliko nga mga lugar.
Pwede suno sa iya nga makabakal sang makahulubog nga mga ilimnon kag dal-on lang sa ila nga mga balay.
Wala ginapasugtan dugang niya, ang pag-inum-inom sa mga sari-sari stores, restaurants, kag mga bars.
Ginpa-athag niya man nga bisan ginapasugtan ang pagkonsumo sang makahulubog nga ilimnon sa mga balay, magabantay gihapon sila sa mga nagatililipon.
Kun maathag suno sa iya nga may nagatilipon sa isa ka balay bangud naga-inum-inom, magapanaway gihapon sila nga mga pulis.
Pwede suno sa iya nga ma-charge ang mga naga-ilinom sa paglapas sa physical distancing. – via Aksyon Night Patrol