Asawa sang Grab Rider nga napatay sang nabungguan sang Fortuner, nagalain ang buot sa ginpahayag indi maayo nga sugilanon nga nabatian sa driver kag iya mga kaupod
ILOILO CITY – Nagalain ang buot ni Kisha Cesnero sa ginpahayag indi maayo nga sigulanon nga nabatian halin sa driver sang Fortuner nga nakabunggo sa iya bana nga si Zsisley Cesnero, 34-anyos sang Brgy. Boulevard, Molo.Si Cesnero ang Grab rider kag madul-ong na kuntani sang order sang nabungguan sang Fortuner nga ginamaneho ni Keith Estellero, 35-anyos sang Tanza Timawa Zone II, City Proper sang Hulyo 1 sang gab-i sa General Luna-Jalandoni Flyover.
Suno kay Kisha, nagpromisa pa ang iya bana nga mabakal sang ice cream sa iya pagpauli bangud birthday sang amo nga adlaw sang ila walo ka tuig nga bata.
Base sa pahayag sang mga nakakita, suno kay Kisha, tuman ka dasig sang Fortuner kag sang nabungguan ang motorsiklo, nagtabog gid ang iya bana kag naglampos pa sa haligi sang flyover.
Ginpahayag man sang mga testigo nga nagapanimaho sang ilimnon ang driver sang Fortuner.
Ginsaysay ni Kisha nga sang amo nga gab-i, nabatian sang iya mga pakaisa nga nagresponder sa police station matapos nadakpan si Estellero nga naghambal pa ang driver nga, “Ari kamo di haw? Ano kamo, kwartahan ninyo ko?” Ginhambal sang mga pakaisa ni Kisha nga wala pa sila nakahibalo sang amo nga tiun nga napatay gid si Zsisley.
Pagkasunod nga adlaw, sang nag-file si Kisha sang statement sa police station, nakabati naman sang sugilanon ang iya iloy kag pakaisa halin sa duha ka babaye nga kaupod ni Estellero. “Ginsugid sa akon sang pakaisa ko. Indi lang siya sure kun sin-o sa duha nga babaye ang naghambal nga, ‘Ma-file kamo kaso? Ka sarang kamo? Kun mapa-settle kamo sa amon, kami mabayad sa ospital. Pwede pa namon kamo tagaan P200,000. Kaya na namon.’ Biskan mangayo na lang tani pasensya anay, pangyaguta pa sila bala porke pigado lang kami,” ang pahayag ni Kisha.
May nagpalapit man kay Kisha nga nagpakilala abogado ni Estellero kag nag-offer nga ma-istorya sa iya.
Desidido si Kisha nga magpasaka sang kaso batuk kay Estellero bisan nga mabudlay para sa iya bangud may tatlo ka bata siya nga gina-atipan, duha sa ila ang ginagatas pa.
Apat ka bulan pa lang ang agot sang mag-asawa.
May mensahe naman si Kisha kay Estellero: “Kabig*an lang iya. May nadula nga tawo, may naapektuhan nga mga bata. Paano mga bata ko subong? Paano kami subong? Sadyahan ka kay may napatay ka nga tawo? Ginoo na bahala sa imo.”
Nagapasalamat si Kisha sa mga riders nga kaupod sang iya bana nga nagabulig gid sa iya.
Nagsindi kagab-i sang kandila sa lugar sa diin natabu ang aksidente ang mga riders. Nag-amot-amot man sila kag nakatipon sang masobra P12,000, sa dugang nga bulig sang mga concerned citizens, agud nga mabayad sa ospital kag mapagguwa ang bangkay ni Zsisley.
Ginkumpirmar naman sang police nga na-release na si Estellero kahapon matapos nga nakapiyansa. Ginatinguhaan sang Aksyon Radyo Iloilo News Team nga makuhaan sang iya bahin ang driver. –via Aksyon Hotline
