PNP Chief Guillermo Eleazar, ginmandu ang matul-id nga imbestigasyon sa buy bust operation sa North Baluarte, Molo nga nagresulta sa kamatayon ni Karl Daniel Bolante

Ginmandu ni PNP Chief, Police General Guillermo Lorenzo Eleazar ang matul-id nga imbestigasyon sa buy bust operation sa North Baluarte, Molo nga nagresulta sa kamatayon sang 29-anyos nga si Karl Daniel Bolante nga natiruhan sang pulis nga nagalagas sang subject sa operation sang Hunyo 29 sang gab-i.

Katuyuan sini nga mahibaluan kun may operational lapses sa natabo.

Ginpahayag ni Eleazar nga ilakip sa imbestigasyon sang Internal Affairs Service ang alegasyon nga may mistaken identity sa operation.

“I understand that there is already a motu-proprio investigation on this but with this allegation, I have already tasked the IAS to look into this new information para malinawan tayo,” ang pahayag ni Eleazar.

Ginpahayag nga nasal-an sang police operative si Bolante matapos nga nagpalagyo ang subject nga si John Dave Mendoza.

Sa report sang Iloilo City Police Office, na-recover sa lugar ang granada kag pusil nga ginapatihan ginapanag-iyahan ni Bolante.

Una na ginpanindugan sang pamilya Bolante nga indi kilalahay sanday Karl kag Mendoza.

Nagpanawagan naman si Eleazar sa mga testigo kag himata sang napatay nga magbulig sa imbestigasyon agud magguwa ang kamatuoran.

“Dahil po sa may alegasyon na namang ganito, tayo at nakikiusap muli sa mga nakakita at kamag-anak ng nasawi na tulungan tayo na mahanap ang katotohanan dito. Kung kayo ay may alam sa nangyaring ito, nararapat lang na panindigan ang katotohanan sa ngalan ng hustisya. At ako naman ay personal na nangangako ng inyong proteksyon kung meron ngang kamalian na nangyari dito,” dugang nga pahayag ni Eleazar.