Pagpahamtang sang mga CCTV cameras sa Diversion Road, Mandurriao, kabahin sang Motor Vehicle Enhancement System sang LTO
ILOILO CITY — Kabahin sang Motor Vehicle Recognition Enhancement System (MVRES) sang Land Transportation Office (LTO) ang pagpahamtang sang 12 ka mga CCTV Cameras sa Diversion Road sa Mandurriao.
Suno kay LTO6 Asst. Regional Dir. Atty. Gaudioso Geduspan, indi lang sa Region 6 ipatuman ang nasambit nga proyekto kundi pati man sa bug-os nga pungsod.
Dugang pa ni Atty. Geduspan, magluwas sa Diversion Road, pahamtangan man sang mga CCTV cameras ang mga pantalan sa Iloilo City, Dumangas, kag Bacolod City.
Wala pa sang pat-ud nga petsa kun san-o umpisahan ang pag-install sang mga CCTV cameras pero ginpahayag ni Geduspan nga mapadulong sa ila opisina ang kontraktor sang proyekto sa Hulyo 14 agud nga mag-survey sang lugar.
Magluwas sa law enforcement, katuyuan man sang pagpahamtang sang mga CCTV camera ang pag-assist sa anti-criminality campaign sang gobyerno, kag madasig nga pagresponde kun may magluntad nga mga emerhensiya sa mga dalanon.
May iga-set up nga regional command center suno kay Atty. Geduspan nga maga-operate sang 24-oras agud nga mag-monitor sa mga CCTV cameras. | via Aksyon Night Patrol