1 patay, 1 pilason sang nabungguan sang ambulansya sa Cabatuan

CABATUAN, Iloilo – Patay ang lola, samtang pilason ang iya duha ka tuig nga apo sang nabungguan sila sang ambulansya sang Calinog LGU sa Brgy. Tiring, Cabatuan las-7:15 kahapon sang aga, Hulyo 11.

Dead-on-arrival sa ospital si Elena Muyuela, 71-anyos, nga may pilas sa agtang kag fracture sa tiil kag kamot. Padayon naman nga ginabulong sa ospital ang iya apo nga si John Ethan nga may pilas sa agtang.

Gin-custody sang Cabatuan police ang driver sang ambulansya nga si Michael Castroverde, 39-anyos sang Calinog.

Suno kay PSSg Joemarie Barrios, imbestigador sang Cabatuan MPS, may hingagawon kuntani nga dal-on nga pasyente sa Iloilo City ang ambulansya. Ginpahayag sang driver nga nagawangwang ang ambulansya kag nagasiga man ang blinker pero nakibot siya sang gulpi nga nagtabok ang maglola.

Ginapreparar sang police ang kaso nga reckless imprudence resulting in homicide kag reckless imprudence resulting in serious physical injury batuk sa driver sang ambulansya. –via Francisco “Kikik” Enar