Ginhalinan sang mga antigen test kits nga ginbilin sa higad sang karsada sa San Vicente, Jaro, natumod na sang Jaro police
ILOILO CITY — Natumod na sang Jaro Police kun diin naghalin ang mga antigen test kits nga nakit-an sa kilid sang karsada sa E. Lopez St. sa San Vicente, Jaro.
Suno kay Capt. Eduardo Siacon, hepe sang Jaro Police Station, gintudlo sang mag-asawa nga basurero nga ginkuha nila sa guwa sang Medicus Diagnostic Center sa La Paz ang mga test kits sa pagdumdom nga pwede nila ini mapakilo.
Sang gin-check sang Jaro Police ang diagnostic center, may nakit-an pa gid sila nga mga nagkalabilin nga test kits sa booth sa guwa sang establisemento. Istoryahan sang Jaro Police kag ni Iloilo City COVID-19 spokesperson Jeck Conlu ang posible nga mangin salabton sang diagnostic center.
Gintinguhaan sang Aksyon Radyo nga makuhaan sang pahayag ang taga-Medicus Diagnostic Center apang sirado pa ang ila opisina sang ginkadtuan sang news team.