‘Wala sang pagbag-o’–Iloilo Gov. Arthur Defensor, Jr. sa guidelines nga ipatuman sa probinsya sang Iloilo tubtob Hulyo 22

ILOILO – Wala sang pagbag-o sa guidelines nga ipatuman sa Iloilo province kasunod nga ginpalawig ang quarantine classification nga Modified Enhanced Community Quarantine (MECQ) tubtob sa Hulyo 22.

Suno kay Governor Arthur Defensor Jr., kun ano ang kaundan sang Omnibus guidelines sang National Inter-Agency Task Force amo man gihapon ang ipatuman kag dugang lang nga health protocols.

Una na nga ginrekomendar sang National IATF nga ipaidalum ang probinsiya sa pinakamataas nga quarantine classification – Enhanced Community Quarantine, pero nag-apelar si Governor Defensor nga ipabilin lang ang MECQ nga quarantine classification sa probinsiya.

Ginpahayag sang gobernador nga may basehan ang IATF sa quarantine classification sang mga Local Government Units (LGUs) pero mahibaluan gid kun ano ang rason nga ginrekomendar ang probinsiya sa ECQ status sa ila nga meeting sa kaupod ang Regional IATF kag taga-DILG bwas, Hulyo 16.