City Proper ABC President John Eric David, nagpangabay sang paghangop bangud indi tanan mahatagan sang food packs halin sa DSWD6

ILOILO CITY — Ginatinguhaan sang mga barangay officials sa City Proper nga matatapan sa pagpanghatag sang food packs ang ila mga residente, kasunod sang pagpaidalum sa Iloilo City sa Enhanced Community Quarantine (ECQ).

Suno kay City Proper ABC President kag Veterans Village Punong Barangay John Eric David, nagapangita sang paagi ang mga barangay officials agud maka-augment sa food packs nga ginhatag sang DSWD6 para mahatagan ang tanan nila nga mga residente.

Ginhalimbawa ni Kap. David ang iya barangay nga may kapin sa 9,000 ka mga residente apang 79 lang ka food packs nga halin sa DSWD6 ang gin-alokar sa ila.

Dako nga porsyento sang populasyon sa iya nga barangay ang nagakinahanglan gid sang bulig dugang pa sang kapitan.

Ginpahayag niya nga may mga naga-donate sa ila sang goods nga amo naman ang ila ginapang-repack kag ginapanagtag sa mga residente.

Ginpa-athag niya nga indi tanan mahatagan kag nagpangabay siya sa mga may mga trabaho pa nga magpa-iway na lang anay.

Samtang, ginhatag naman nila sa naka-quarantine nga mga residente ang mga food packs nga halin sa DSWD6 bangud duha ka semana gid sila nga indi makaguwa.

Wala na nalantaw pa sang kapitan kun ano ang unod sang food packs bangud sirado kag nagalikaw siya nga mamalisyahan.

Mas maayo suno sa kay Kap. David nga selyado ini gihapon nga maka-abot sa mga residente.