Iloilo province, naka-record sang nagkalain-lain nga variant sang COVID-19; Prov’l gov’t, nag-athag nga fully-recovered na ang mga kaso

ILOILO – May na-detect nga 15 ka kaso sang Alpha COVID-19 variant, 14 ka Beta variant kag isa ka P.3 variant sa probinsiya sang Iloilo.

Suno kay Iloilo Provincial Administrator Atty. Suzette Mamon, kahapon, Hulyo 22, gin-forward sa ila sang Department of Health (DOH) ang report.

Wala nakahibalo si Mamon kun san-o ginpadala sang DOH 6 ang samples para sa genome sequencing sa Philippine Genome Center pero subong lang nagguwa ang resulta.

“Actually they are completely and fully recovered na ni sila [sa COVID-19],” suno sa kumpirmasyon ni Mamon, base sa impormasyon nga nakuha niya sa Provincial Health Office kag DOH.

Kasunod sang na-record nga kaso, magahimo subong sang backtracking sa case profile sang mga nagpositibo sa variant lakip na kun may travel history ang mga kaso.

Padayon ang panawagan ni Mamon sa mga residente nga mag-obserbar gid sang minimum health protocols kag magpabakuna batok sa COVID-19.

Ang Alpha variant, una nga natukiban sa United Kingdom, sa South Africa naman ang Beta variant samtang sa Pilipinas, una na-detect ang P.3 variant.

Una na gin-athag sang DOH nga madugay magguwa ang resulta sang genome sequencing. Paagi sa genome sequencing, mahibaluan kun ano nga variant sang COVID-19 ang nag-infect sa COVID-19 positive. — via Aksyon Ariel Solacito