4 banwa sa Southern Iloilo, tuman nga naapektuhan sang pagtaas sang tubig dagat bangud sang dalagku nga mga balod — PDRRMO

ILOILO – Tuman nga apektado sang pagtaas sang tubig halin sa dagat bangud sa mabaskog nga balod ang mga kabanwahanan sa southern part sang Iloilo.

Ini base sa data sang Provincial Disaster Risk Reduction and Management Office (PDDRMO), suno sa ila head nga si Dr. Jerry Bionat nga ginalakipan sang Oton, Tigbauan, Guimbal, kag Miag-ao. Halos tanan nga coastal barangays sang nasambit nga mga banwa ang apektado sang pagtaas sang tubig.

Sa data sang PDRRMO, 9 ka balay ang totally damaged samtang anum ang partially damaged sa Oton; 85 ang partially kag 19 ang totally damaged nga balay sa Tigbauan; pito ang partially damaged sa Guimbal; kag 12 ang partially kag isa ka totally damaged nga balay sa Miag-ao.

May mga residente suno sa iya nga nag-evacuate sa ila katupad nga balay nga indi malab-ut sang tubig samtang may mga nagtiner naman sa evacuation centers kag nahatagan na sang family food packs ang mga apektado nga pamilya.

May tagsa ka food packs na, suno sa iya, nga ginapreparar ang tagsa ka mga kabanwahanan.

Wala naman sang gin-report nga kahalitan sa northern part sang Iloilo. Ginsuhestiyun naman ni Bionat nga dapat magpangita sang paagi ang mga LGUs nga mapaisol ang mga pamalay nga malab-ut subong sang baha, sa lugar nga indi na sila malab-ut agud indi na sila mahalitan.

Ini bangud nga nagabalik gihapon ang mga residente nga nagub-an sang balay sa ila binalayan.