Antique, nakapreparar na sa posible paglapta sang Delta variant sang COVID-19 — Gov. Rhodora Cadiao

Nakapanghanda na ang probinsiya sang Antique sa posible nga paglapta sang Delta variant sang COVID-19.

Ginpahayag ni Antique Gov. Rhodora Cadiao, may duha na sila ka mga ospital nga ginpang-convert sa COVID hospital. Isa diri ang may 100 bed capacity santang may 50 bed capacity naman sa isa.

Dugang pa ni Gov. Cadiao, madugay na nila nabaton nga posible magdamo ang kaso sang Delta variant sa ila nga lugar apang wala lang nila ini ginpahibalo sa publiko agud malikawan ang panic.

Nagapati man siya nga Delta variant ang rason sang pagsaka sang kaso sang COVID-19 sa Antique halin pa sang nagliligad nga mga inadlaw.

Sa pinakaulihi nga record sang DOH, 19 ka Delta variant ang na-detect sa Antique.

Ginkumpirmar man ni Gov. Cadiao nga naghalin ini sa mga banwa sang Libertad, Pandan, Sebaste, Culasi, Bugasong, San Jose, kag Belison.

Matandaan nga sa Pandan, Antique man na-detect ang una nga kaso sang Delta variant sang COVID-19 sa Western Visayas.