LTO, nagpapanaug sang memorandum nga naga-require sang inspection halin sa PMVICs sa mga motor vehicles antes makaparehistro

Nagpapanaug sang memorandum ang Land Transportation Office nga naga-require sang inspection halin sa Private Motor Vehicle Inspection Centers sa mga motor vehicle antes makaparehistro ukon magpa-renew sang rehistro.

Base sa nasambit nga memorandum nga gin-issue sang Agosto 6, kinahanglan nga ma-agi sa PMVICs ang mga light vehicle pareho sang awto, motorsiklo, tricycle ukon mga vehicles nga nagabug-at sang mas magnubo sa 4,501 kilograms.

Sang Lunes, Agosto 9, nagsugod na ang PMVIS (Private Motor Vehicle Inspection System) sa Bacolod City kag Roxas City, Capiz nga mangin requirement sa pagparehistro ukon renew sang rehistro sa LTO.

Samtang, wala pa naga-operate ang PMVIC sa syudad kag probinsya sang Iloilo.

Base sa impormasyon nga nakuha sang Aksyon Radyo Iloilo, ginabanta sa ulihi nga semana sang Setyembre, makasugod na ang operation sang PMVIC sa syudad kag probinsya sang Iloilo.

Kasunod sini, mangin requirement naman ang pag-agi sa PMVICs sang mga light vehicles antes makaparehistro ukon renew sang rehistro sang salakyan.