Residente sa Alta Village, Jaro, nagreklamo nga ginahimo nga garahe sang mga salakyan sang ‘Regional Director’ ang karsada sa subdivision
ILOILO CITY — Ginreklamo sang residente sa Alta Tierra Village, Jaro nga ginahimo nga garahe sang mga salakyan sang ila kasilingan ang ila nga karsada rason nga indi man sila makaagi.
Suno sa tagreklamo nga si Mr. Jun Jagna-an, madugay na nila nga problema ang nakahilera nga salakyan sang ginkilala niya nga si “Director Osmeña” apang natahap nga magreklamo.
“Dugay na ni nga problema di. Ugaling kalabanan diri daw medyo tahado bala kay kumo siya, regional director kuno,” ang pahayag ni Jagna-an.
Sa pagkahibalo ni Jagna-an, naga-apelyido sang Osmeña ang Regional Director sang Land Transportation Franchising and Regulatory Board (LTFRB 6).
Nakita man niya nga isa sa mga salakyan nga naga-park sa karsada may “LTFRB” nga plaka.
Wala naman sang plaka ang iban nga salakyan.Ginpahayag ni Jagna-an nga naga-obstruct sa driveway sang iban nga homeowners ang salakyan ni “Director Osmeña.”
Bisan ang iban nga naga-deliver suno sa iya ang nabudlayan man nga makasulod sa ila nga lugar sa corner Chico-Datiles Streets sang subdivision.
Kaina sang aga, nakaba-is ni Jagna-an ang suno sa iya abyan nga babaye ni “Director Osmeña” nga naga-drive sa isa sa mga salakyan.
Nagpangabay ang tagreklamo nga idugon kuntani ang salakyan agud nga makaagi man siya apang ginbuyayaw lang siya sang babaye.
Ginpalab-ut na ni Jagna-an sa Homeowners Association sang Alta Tierra Village ang amo nga concern.
Plano man niya nga ipalab-ut sa barangay officials ang reklamo.
Gintawgan naman sang Aksyon Radyo ang duha ka cellphone numbers ni LTFRB 6 Director Richard Osmeña agud hibaluon kun siya gid man ang ginatumod nga “Director Osmeña” sang tagreklamo, apang naga-ring lang ang iya telepono.
