PESO-Iloilo City, magahiwat sang labing una nga Online Job Fair kadungan sang 84th Charter Day sa siyudad
Magahimo sang labing una nga online job fair ang Public Employment Service Office – Iloilo City kadungan sa pagselebrar sang 84th Charter Day sa syudad.
Suno kay Mr. Gab Umadhay, head sang nasambit nga ahensya, may yara sang 30 ka kompaniya ang magapasakop sa online job fair sa Agosto 25 tubtob 27.
Dugang pa niya nga tuigan ini nila ini nga ginahimo pero bangud sa COVID-19 pandemic, nagdesisyon ang mga kompaniya kag ang PESO-Iloilo City nga himuon ini online.
Magatanyag naman sang masobra 500 jobs ang mga kompaniya indi lang sa Pilipinas kag pati man overseas.
May yara sang 200 jobs nga available sa local level kag 300 jobs nga bakante sa guwa sang pungsod, suno kay Umadhay.
May mga kabudlayan man nga ginpangatubang ang mga PESO-Iloilo City sa paghimo sang online job fair apang indi ini naging upang agud nga mapadayon nila ang isa ini nga mga pamaagi agud mabatak ang ekonomiya sa syudad.
Padayon naman nga nagahimo sang nagkalain-lain nga lihok kag ‘sustainable solutions’ ang PESO-Iloilo City agud makapangita sang palangitan-an ang mga indibidwal nga nadulaan sang trabaho.
Base sa ila datos, nagdangat na sa 1,000 tubtob 1,500 employees ang nawad-an sang trabaho bangud man sa epekto sang pandemya.
Bukas ang labing una nga online job fair sa syudad sa mga job seekers indi lang sa mga taga-Iloilo City kundi pati man sa mga kaiping nga mga probinsya sa rehiyon.
Nagpasiguro naman si Umadhay nga tanan nga mga resume nga ginapasa sa ila ang pagabatunon amo nga nagpanawagan man siya nga kinahanglanon nga may yara sang signal ang mga cellphones sang mga nagpasakop agud matawagan para sa interview. – via Public View