‘Daw indi man ko magpati kay ti layo ni nga barangay’ — Alimodian Mayor Geefre Alonsabe sa na-detect nga Delta variant sa iya banwa
ILOILO — Negatibo ang impormasyon nga may na-detect nga Delta variant sang COVID-19 sa Alimodian.
Ini ang ginkumpirmar ni Alimodian Mayor Geefre Alonsabe base man sa pag-validate sang COVID team sang banwa sa pagpanguna ni Vice Mayor Ian Kenneth Alfeche.
Suno kay Mayor Alonsabe, ginpahibalo siya kahapon ni Vice Mayor Alfeche nga negatibo nga may Delta variant sa ila banwa sang ila gin-validate ang ginasuspetsahan nga pasyente.
Dugang pa ni Mayor Alonsabe, bisan siya ang indi man makapati nga ma-infect sang Delta variant ang pasyente bangud malayo kag nabukid nga barangay na ang iya nga gina-estaran.
Ginpahayag niya man nga wala sang travel history ang pasyente.
Sa pihak sini, nagpatuman gihapon ang banwa sang surgical lockdown sa natungdan nga barangay.
Ginpabutyag ni Mayor Alonsabe nga prayoridad gihapon nila ang siguridad kag ikaayong lawas sang mga tawo.
Ginpangabay niya man sa publiko nga indi dapat maghatag sang kumpiyansa kag mangin vigilant sa tanan nga tiun.
Matandaan nga base sa record sang Provincial Health Office (PHO) isa sa mg ana-detect nga Delta variant sa probinsiya ang naghalin sa Alimodian. — via Aksyon Night Patrol