Lalaki, nasapwan patay kag may pilas sang pagkatiro sa Estancia
ILOILO – Patay na sang nasapwan kag may pilas sang pagkatiro si Brian Alconga, 36-anyos, sa Purok 3, Brgy. Lonoy, Estancia kaina ang aga.
Suno kay PLT Joebert Amado sang Estancia MPS, natukiban si Alconga sa sala sang balay nga iya ginateniran kag may pilas sa sag-ang.
May nakita nga empty shell sang wala pa matumod nga pusil sa guwa sang balay. Isahanon lang sa balay si Alconga bangud yara sa luwas sang pungsod ang iya live-in partner, samtang nagatenir ang iya mga bata sa iya ugangan nga malapit man sa balay sang biktima.
Sa inisyal nga pagpangusisa sang police, may nabatian nga lupok mga las-nueve kagab-i, pero kaina lang sang aga nasapwan si Alconga.
Person of interest, suno kay PLT Amado, ang kaupod kun kaisa ni Alconga sa balay nga himata sang iya live-in partner pero indi na makita sa barangay.
Suno naman sa utod sang biktima, wala man siya sang nahibaluan nga kontra ang iya manghod. Pero sang Biernes, Setyembre 3, nagpanugid sa iya ang biktima nga may sungguranay sila sang pakaisa sang iya live-in partner.
Ang pakaisa ang nagakadto kun kaisa sa balay ni Alconga, suno sa iya utod. Gina-imbestigaran sang Estancia police ang motibo sa pagpatay sa biktima. — via ARI correspondent Jerry Medina
