Voter registration sa Iloilo City Comelec Office, tubtub na lang sa Sept. 9; Satellite registration venues, pangbuksan umpisa Sept. 10
ILOILO CITY – Tubtob na lang sa Setyembre 9 ang voter registration sa City COMELEC Office. Ini ang ginkumpirmar ni Election Asst. II Mr. Jonathan Sayno.
Umpisa sa Setyembre 10, may pangbuksan nga mga satellite registration venues agud mangin matawhay kag indi magdinaguso ukon magginutok ang mga maparehistro, kag para man nga mapatuman sang insakto ang minimum health standards.
May anum ka mga satellite registration venues suno kay Sayno. Una diri ang SM City sa Setyembre 10 kag 11; Robinsons main mall sa City Proper sa Setyembre 13 kag 14; Ateneo de Iloilo sa Setyembre 15; BJMP Dormitory sa Setyembre 16 para naman sa mga Persons Deprived of Liberty (PDL); UP Visayas City campus sa Setyembre 18; kag sa University of Iloilo sa Setyembre 20.
May ginaproseso pa ang COMELEC nga isa ka dako nga unibersidad para nga mangin venue tubtob sa katapusan sang registration sa Setyembre 30.
Bukas para sa tanan nga luyag magparehistro ang nasambit nga mga venues suno kay Sayno magluwas lang sa BJMP Dormitory.
Dapat nga naka-full face shield gid kag naka-face mask kun magkadto sa venue kag magdala sang kaugalingon nga ballpen suno kay Sayno. — via Aksyon Night Patrol