‘Bantayan man lang ang side effects’ – DOH 6 Epidemiologist Dr. Jessie Glen Alonsabe sa reklamo sang taga-Iloilo City nga lain nga brand sang COVID-19 vaccine ang gintublok sa iya sa second dose

ILOILO CITY – Bantayan lang kun may Adverse Effects Following Immunization (AEFI) kay alyas Jane sang syudad nga nagreklamo nga lain nga brand sang COVID-19 vaccine ang gintublok sa iya sa second dose.

Suno ini kay Department of Health epidemiologist Dr. Jessie Glen Alonsabe.

Ginpabutyag ni Dr. Alonsabe nga indi man daku nga issue ang vaccine mixing, “kay sa iban nga countries, ginatun-an na nila. Pero diri sa Pilipinas, tungod wala pa na-sanction ang vaccine mixing, wala pa sang signal nga pwede na.”

May guidelines man ang DOH suno kay Alonsabel nga “on extreme cases kag wala na gid kuhaan sang second dose, you can resort to another vaccine kun wala na gid sang available nga vaccine sa original nga ginhatag.”

Ginpanugyanan ni Alonsabe si Jane nga kun desidido siya, mag-file lang siya sang formal complaint agud ma-imbestigaran nila.

“Ang advice sa iya is that i-formalize niya ang iya report. Kadto siya sa health center ukon sa City Health, antes siya magkadto diri sa Department of Health,” suno kay Alonsabe.

Sa record, suno kay Dr. Alonsabe, may tatlo ka kaso na nga kapareho sa reklamo ni Jane, kag wala sila sang nabaton nga report sang AEFI bangud nagsala ang gintublok nga brand sang bakuna sa second dose. – via Aksyon Hotline