‘First come-first serve kita’ –Iloilo City Comelec Election Assistant II Jonathan Sayno sa nagapadayon nga voter registration
ILOILO CITY – Wala nagahatag sang numero sa mga nagapila para sa voter registration ang City Comelec.
Suno kay Election Assistant II Jonathan Sayno, indi lang nila luyag nga may magginamo bangud may mga nagareklamo man sa paghatag sang priority numbers.
“Wala kita nagahatag sang numero – first come, first serve kita,” suno kay Sayno.
Las-otso nagabukas ang registration sa mga voter registration site, pero kaagahon pa lang, malaba na ang pila base sa pag-obserbar sang Aksyon Radyo News Team.
Ginpabutyag man ni Sayno nga limitado lang sa indi magnubo sa 1,000 ang ila ma-akomodar sa kada venue, depende sa kapasidad sang venue.
Indi man makadugang sang venues, suno kay Sayno, bangud dapat gid mag-obserbar ang election supervisor base sa ila patakaran. Indi suno sa iya matunga sang election supervisor ang iya oras sa madamo nga venues.
Nag-request na lang si Sayno sang bulig sang Compliance Team kag police agud magbulig sa pagbantay sa seguridad kag pagpatuman sang mga health protocols sa registration site.
Enero 2020 sang nagsugod ang voter registration pero makapila ka beses nga na-untat bangud sa mga quarantine classifications sang nagsugod ang pandemya. Sa Iloilo City, Setyembre 6 liwat nga nag-resume ang voter registration, suno kay Sayno. – via Aksyon Hotline