Pilot testing sang face-to-face classes sa mga areas nga low risk sa COVID-19, gin-aprubahan ni Pres. Duterte

Ginkumpirmar ni DepEd Sec. Leonor Briones ang pag-aprubar ni Presidente Rodrigo Duterte para sa pilot testing sang limited face-to-face classes.

Nagpadala si Briones sang written guidelines nga nagapakita sang combined guidelines sang DepEd, DOH, IATF, kag child education expert.

Suno kay Briones, 100 ka public schools sa minimal risk areas ang magapartisipar sa pilot testing.Ang dugang naman nga 20 private schools ang subject naman sa joint validation sang DepEd kag sang DOH.

Ang amo nga mga eskwelahan dapat nga nakapasar sa ginhimo nga readiness assessment.

Base sa guidelines, 12 ka mga learners ang pasugtan sa Kindergarten, 16 ka mga learners sa Grades 1 tubtob 3 kag tubtob 20 sa Technical-Vocational students sa Senior High Schools.

Tatlo ka oras ang maximum nga klase sa Kindergarten tubtob Grade 3 kag apat ka oras sa Senior High School.

Duha ka bulan nga hugot i-monitor ang himuon nga pilot testing sang limited face-to-face classes.

Suno kay Briones, untaton ang pilot implementation sang limited face-to-face classes kun may pagbag-o sa risk assessment sa isa ka lugar.

Sa Iloilo, nalakip sa mga eskwelahan para sa pilot implementation sang limited face-to-face classes ang Tomas Confesor Elementary School sa Cabatuan; Granada National High School Ballesteros Campus sa Carles; Palanguia National High School sa Pototan; Adgao-Tagpu-an-Ingay Integrated School sa Tubungan, kag Cabacanan Elementary School sa Alimodian.

Una na gin-anunsiyar sang gobyerno nga dapat may pahanugot sang Local Government Unit kag mga ginikanan ang paghiwat sang face-to-face classes.