Kongreso, proper venue agud pamatian ang issue sa ILECO 1, MORE Power suno kay 2nd District of Iloilo Rep. Michael Gorriceta
ILOILO – Luyag ni 2nd District of Iloilo Rep. Michael Gorriceta nga mahatagan sang patas nga oras ang taga-ILECO 1, mga nagareklamo batuk sa ila serbisyo kag taga-MORE Power.
Ini ang rason sang pagduso ni Gorriceta, upod kay 4th District of Iloilo Rep. Braeden John Biron, sang House Bill No. 10271 nga nagatuyo sa pag-amendar sang franchise sang MORE Power kag pag-expand sang franchise area sa 2nd kag 4th districts.
Suno kay Gorriceta, tatlo ka bulan na nga nagareklamo ang taga-Pavia kag nagpasar man sang resolution ang Sangguniang Bayan nga nagahingyo sa kongresista nga i-lobby kun pwede mapaidalum ang banwa sa franchise area sang MORE Power bangud sa ginpahayag indi maayo nga serbisyo kag mahal nga power rate sang ILECO 1.
“Ginsugudan ta ini para matagaan equal, patas [nga tiempo] ang tagsa ka bahin. Amo ni ang proper or ensakto nga pala-agyan para ma-istoryahan sa ibabaw sang lamesa sa Kongreso. Kay ti, diri man ga-grant kag ga-disapprove sang franchise. Para once and for all, mabutangan ta na sang closure [ang issue],” suno kay Cong. Gorriceta.
Masugod subong nga adlaw, Setyembre 28, ang committee hearing sa House Committee on Legislative Frachises kag imbitado ang representatives sang ILECO 1 kag MORE Power.
Una na ginpabutyag ni Gorriceta nga indi mahapos ang proseso sa pagpalapad sang franchise area sang MORE Power bangud maga-agi pa ini sa Senado kun makapasar gid man sa Kamara. –via Aksyon Hotline