Mga grupo nga nagasuporta kay Davao City Mayor Sara Duterte sa Iloilo, matipon sa Setyembre 30 agud iduso ang pagpadalagan sang alkalde nga presidente sa 2022 elections

ILOILO CITY – Magatipon buwas sa aga, Setyembre 30, ang mga grupo sa Iloilo nga nagasuporta kay Davao City Mayor Sara Duterte.

Suno kay Mr. Fortunato Pelaez, head convenor sang Mayor Sara Duterte Alliance (MASADA) sa Western Visayas, las-7:30 sila ma-convene sa Fort San Pedro antes maglibot sa bilog nga syudad.

May permit ang grupo nga gin-aprubahan ni Mayor Jerry Treñas, suno kay Pelaez. Gin-athag niya nga wala na sila sang programa pagkatapos sang caravan, kag ginpasiguro nga sundon nila ang mga health protocols.

Katuyuan sang ila pagtipon nga ipanawagan kay Mayor Duterte nga magpadalagan nga presidente sa 2022 elections.

Suno kay Pelaez, luyag nila ipabatyag kay Mayor Duterte, “nga kinahanglanon siya sang bilog nga pumuluyo nga nagahandum sang pagpadayon sang ‘tunay’ nga pagbag-o.” –via Aksyon Hotline