‘Ang pag-declare sang nuisance candidate, dapat ipaagi sa verified petition’ –Iloilo City Comelec Election Assistant II Jonathan Sayno
ILOILO CITY – Kinahanglan nga may verified petition agud maproseso ang pagdeklarar sa nag-file sang certificate of candidacy para sa 2022 elections nga nuisance candidate.
Suno kay Mr. Jonathan Sayno, Election Assistant II sa City Comelec, “Ang petitioner, dapat ang maka-file sang petition ang kapareho niya nga kandidato sa kapareho nga posisyon sa diin sila nagapadalagan.”
Kinahanglan nga ma-file ang petition sa sulod sang lima ka adlaw pagkatapos sang katapusan nga adlaw sang COC filing.
Kun wala sang mag-file sang petition, “by motu propio” suno kay Sayno, ang Comelec ang nagaproseso agud madeklarar nga nuisance ang nag-file sang COC.
Dapat suno kay Sayno nga madasig ang pagtumod kun sin-o ang matuod-tuod kag seryoso nga kandidato bangud ginakulang na ang Comelec sang tiempo. “Dapat mahikot ini antes mag-imprinta sang balota.”
Kun may petition batuk sa nag-file sang COC, ginapatawag ini sa Comelec Central Office kag ginapasumiter sang affidavit nga seryoso siya sa iya pagpadalagan.
“Ipakita niya nga may ikasarang [siya] nga magpadalagan sang iya kampanya. Wala siya naga-create sang confusion ilabe na gid sa kapareho ang apelyido,” ang pahayag ni Sayno. –via Aksyon Hotline