ICPO, nagahingyo sang bulig sang publiko agud ma-identify ang yara sa likod sang modus nga pag-siphon sang gasolina sa naka-park nga mga salakyan

ILOILO CITY – Nagpanawagan si Iloilo City Police Office spokesperson PCPT Shella Mae Sangrines sa may mga ihibalo sa modus nga pagpasuyop sang gasolina sa mga naka-park nga mga salakyan nga makig-angut kag magpahibalo sa malapit nga police station.

Ginpasiguro ni Sangrines ang safety sang mga makahatag sang impormasyon. Importante suno sa iya nga makilala ang mga yara sa likod sang modus agud nga madakpan.

“Sa mga netizens naton, kun may impormasyon, please feel free nga magtawag kag magpalab-ut sang impormasyon sa malapit nga police station. Kun gusto nila nga mangin anonymous sila, we can do that para maproteksyonan sila. Importante mabal-an ta kag ma-identify kun sin-o ang mga tonto nga ini,” suno kay Sangrines.

Nagapangabay man ang ICPO sang kooperasyon kag bulig sang mga barangay officials paagi sa pagbantay kag pag-secure sang ila nga lugar.

Duha ka indibidwal na ang nag-report sa Mandurriao Police Station nga natukiban nila nga gin-guba kag gin-siphon ang gasolina sang iya gin-park nga salakyan –isa diri ang natabu sa Atria kag isa malapit sa Western Visayas Medical Center.

Pero magluwas sa Mandurriao, may report man sang kapareho nga natabo sa Jaro. – via Aksyon Reports Morning Edition