Isa ka team sang ASISU, i-deploy sa mga dalanon sa palibot sang Iloilo Terminal Market agud malikawan ang on-road parking

ILOILO CITY – May i-deploy nga isa ka team sang Anti-Squatting and Illegal Structures Unit (ASISU) sa mga dalanon sa palibot sang Iloilo Terminal Market agud madula ang mga naga-on road parking nga ginatunaan sang pagpugok sang trapiko.

Sang una suno kay Public Safety and Transportation Management Office (PSTMO) Head Jeck Conlu, may team nga gina-deploy sa lugar pero na-untat bangud ginpaidalum ang siyudad sa Enhanced Community Quarantine.

Suno kay Conlu, bilog nga adlaw sa masunod nga semana, pabantayan ang lugar agud masiguro nga wala sang may mag-on road parking.

Paupdan man sang police ang team sang ASISU nga i-deploy bangud madamo sang maisog sa lugar.

Sa pagkamatuod suno kay Conlu, may mga personnel sila nga ginapahog, ginhana-an nga bun-on, kag may violator na nga napasakaan sang kaso matapos nagpanumbag.

I-deputize man ang mga barangay officials sang barangay nga nagasakop sa lugar para makapang-issue sang citation ticket sa mga violators.

Ginaplastar pa ini bangud ipaidalum sa seminar ang mga natungdan sa pag-issue sang citation tickets. Ginpasiguro niya nga may pagbag-o sa lugar sa masunod nga semana. — via Aksyon Reports Afternoon edition