November 27, 2021

LTO6 ARD Engr. Arturo Apolinar, apat ka beses nga nag-disregard sa traffic light kag wala nagdulog bisan ginlagas na — Traffic aide

Read Time:2 Minute, 31 Second

ILOILO CITY – Apat ka beses na nga natabu nga nag-disregard sa traffic light ang salakyan nga ginamaneho ni Land Transportation Office (LTO) 6 Assistant Regional Director Arturo Apolinar kag wala gid nagdulog.

Ini ang ginbuyagyag ni Alyas Fritz, ang traffic aide nga nagabantay sa traffic lights sa El-98 Street, Jaro Iloilo City bangud isa siya sa mga naglagas sa salakyan pero wala gid nagpundo.

Ang ika-apat nga insidente, nagluntad kaina, Oktubre 25, kag nakilal-an nila nga si Apolinar ang violator bangud ginsundan gid ni Fritz tubtob sa LTO-6.

Sa kada tiun suno sa iya nga lagson nila ang salakyan halin sa una nga tiun nga nag-beating the red light, nagahambal lang ang naga-maneho nga “Sundon niyo lang ko sa LTO – sa opisina.” Gin-aku ni Fritz nga kahapon lang gid nila nakilal-an nga si Apolinar ang nag-violate.

Nanindugan pa si Fritz nga sa ikatatlo nga tiun nga paglapas ni Apolinar, didto lang sang nakuha nila ang plate number sang salakyan pero may sala nga isa ka letra gani wala gilayon na-identify.

Tatlo ka traffic aides ang naglagas kay Apolinar kaina halin sa traffic lights sa El-98 matapos nga “nag-beating the red light” kag wala nagdulog.

Naghapit ang duha sa police station agud mag-report samtang si Fritz ang nagsunod gid tubtob sa LTO 6. May nag-abot nga duha ka police kag ang ila nga supervisor nga amo ang una nag-istorya kay Apolinar.

Nag-atubangay man ang traffic aides kag si Apolinar kag ginpanindugan ni Fritz nga nag-aku ang opisyal nga hungod niya ang pag-beat sa red light agud sundon siya sa opisina.

Ginhambalan pa sila, suno sa iya ni Apolinar nga “Te ano dakpon niyo ko?”Nagpabutiyag pa si Apolinar, suno kay Fritz, nga dapat sila nga mga traffic aides ang dakpon bangud naka-park ang ila motorsiklo sa kilid nila nga yara sa karsada.

Naglakat ang mga traffic aides nga wala na-ticketan si Apolinar.

WALA SANG MAY GINLAPAS NGA TRAFFIC RULES

ILOILO CITY — Nanginwala si LTO-6 Assistant Regional Director Engr. Arturo Apolinar nga naglapas siya sa traffic rules.

Sabat ini ni Apolinar sa report nga gin-istorya siya sang mga traffic enforcers bangud nga nagdiretso bisan nga pula ang traffic light.

Suno kay PSTMO Head Mr. Jeck Conlu, nag-report ang iya mga personnel nga may personnel sang LTO-6 nga nagalapas sang traffic rules sa L-98, Jaro kag makatatlo na niya ka beses nga ginhimo.

Apang ginapanindugan ni Engr. Apolinar nga wala siya sang may ginlapas nga traffic rules.

Paathag niya, may nabilin pa nga tatlo ka segundos antes nagpula ang stoplight gani nagdiretso siya.

Halin sa Tabucan, Mandurriao si Apolinar kag pakadto sa iya opisina.

Ginpahayag man ni Apolinar nga ginhambalan niya ang traffic enforcer nga sundon lang siya sa iya opisina agud mahibaluan kun ano ang iya violation.

Suno naman kay LTO-6 Operations Division chief Atty. Allan Sacramento, wala pa nakalab-ot sa ila ang ini nga impormasyon.

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Previous post Insidente sang pag-siphon sang gasolina kag pagkawat sang accessories sa pila ka naka-park nga salakyan sa Iloilo City, ginabanta na sa walo tubtob siyam suno sa ICPO director
Next post Una nga kaso sang B.1.1.318 COVID-19 variant, na-record sa Pilipinas — DOH